Լեհվազի միջնակարգ դպրոց

want to change the front fhoto

ԼԵՀՎԱԶԻ ՄԻՋՆԱԿԱՐԳ ԴՊՐՈՑ

Նոյեմբերի 23rd, 2017

Դպրոցի  պատմություն

Սյունյաց գողտրիկ աշխարհի գեղատեսիլ հովիտներից մեկում է ծվարած Լեհվազի միջն. դպրոցը:
1922թ. հիշարժան էր Լեհվազ համայնքի համար նրանով, որ այդ տարում իր մեկնարկը սկսեց գյուղի առաջին աստիճանի դպրոցը, և հյուսվեց մի կրթօջախի պատմություն: Պատմություն մի անխոնջ տքնանքի, հույսի ու հուսալքության, լույսի ու հաղթանակների մասին: Պատմությունն այս հյուսվեց տարիներ ի վեր, հյուսվեց դանդաղ, հազարավոր սրտերի բաբախների ներքո, հարյուրավոր ուսուցիչների անմնացորդ նվիրումի շնորհիվ:
95-ամյա տարեգրության ամեն մի օրն այստեղ արարող մանկավարժների կենսագրությունն է և նրանց կյանքի մի մասնիկը: Յուրաքանչյուր տարի դպրոցի հիմնադրման օրը` մայիսի 19-ին, հեքիաթի հրաշք ոգին թևածում է դպրոցի կամարների ներքո: Ահա այստեղ է , որ փոքրիկ լեհվազեցին սերտում է 1600-ամյա մեր փառավոր այբուբենը, զիվորագրվում հայոց գրերին և երդվում արժանավոր սան լինել դպրոցի համար, սերնդեսերունդ փոխանցել մեր լեզուն և հավատքը: Կրթական մյուս աստիճաններում գնահատում է հայոց անմահ, մշտապես խնկարկումի արժանի մեծերին, հաղորդակցվում համաշխարհայի գրականության գոհարներին և, ի վերջո, ստանում իր մարդկային հոգեկերտվածքը` արժևորելով առաքինությունն ու բարությունը, հայրենասիրությունն ու գթասրտությունը:
Երբ 1988-1989թթ. սկսվեց Ղարաբաղյան շարժումը, երբ սասանվեց հայոց տան անդորրը, երբ դեռ մորմոքվում էինք երկրաշարժի վերքերից, Լեհվազը վերաբնակեցվեց փախստական հայրենակիցներով: Այդ ծանր ժամանակներում օդի ու ջրի պես առաջնային էր հայկական դպրոցի վերաբացումը: Եվ այդ պատասխանատու աշխատանքը հանձն առավ Բաքվից գաղթած Վարդան Պետրոսյանը:
Այժմ, երբ տարիների հեռվից նայում ենք անցած ուղուն, հպարտությամբ ենք հիշում, թե անկախ ցածր աշխատավարձից և պետության համար անցումային մյուս դժվարություններից, ինչ նվիրումով էինք աշխատում, սովորեցնում հայ մանուկին մեր քաղցրաբառ հայերենը:
2006-ից դպրոցի ղեկավարությունը ստանձնեց բազմամյա մանկավարժական աշխատանքային բովում թրծված,արարող և ստեղծող մի անձնավորություն` Ժորա Միրզոյանը:Նրա ջանքերի շնորհիվ դպրոցի շենքը վերանորոգվեց,կահավորվեց և դարձավ ուսումնական հաճելի ու հարմարավետ կրթօջախ:Դպրոցում ձևավորվեցին բազմաթիվ ավանդույթներ`առավոտյան լիցքային վարժությունները, առարկայական շաբաթներն ու տասնօրյակները, տոնա-կան բազմաբնույթ միջոցառումները, հայերեն և օտար լեզուներով տիկնիկային ներկայացումները, բանավեճերը սպորտլանդիաները, հայրենագիտական արշավները…
2012թ  դպրոցի  տնօրեն  նշանակվեց Վ.Վարդանյանը:  Շուրջ 6 տարի դպրոցը հյուրընկալել է Ամերիկյան խաղաղության կորպուսի կամավորներին ` Դանյա Օգասթասին և Թոմաս Սիրզին,  Քեթի Սթյուվորդին:  Համատեղ աշխատանքի շնորհիվ դպրոցի սովորողները բազմաթիվ հաջողություններ են ունեցել հանրապետական մրցույթներում,առարկայական օլիմպիադաներում: Հաջողված ծրագրերի շրջանակներում, Ամերիկյան դեսպանատան աջակցությամբ վերանորոգվել և կահավորվել է անգլերենի կաբինետը, համալրվել անգլերեն արժեքավոր գրքերով,համակարգչով,պրոյեկտրով:
Ամեն տարի պետական բուհեր են ընդունվում դպրոցի լավագույն շրջանավարտները:Այսօր հպարտությամբ արձանագրում ենք, որ զուր չեն եղել մեր ջանքերն օրինակելի և կայացած դպրոց ունենալու գործում:
Շնորհակալ ենք մեր տարածաշրջանի ղեկավարությանը` մեր աշխատանքն ըստ արժանվույն գնահատելու համար: Թող հարատևի տարեգրությունդ, սիրելի դպրոց,և քո գիտելիքների լույսը փարոս դառնա կյանք մտնող բազում սերունդների համար: